“Mələklər və Şeytanlar”

Bu gün sizə Dan Braunun “Mələklər və Şeytanlar” adlı kitabının əsasında çəkilmiş və 2009-cu ildə tamaşaçılara təqdim edilmiş eyniadlı filmi təhlil edəcəyik.

Baş rollarında məhşur aktyorlar Tom Hanks, Ayalet Zurer, Ewan McGregorun çıxış etdiyi film Dan Braunun “Da Vinçi şifrəsi” kitabı əsasında çəkilmiş filmin uğurlu ekranlaşdırılmasından sonra tamaşaçılara təqdim edilmişdir. Həmin film bir sıra uğursuz səhnələrinə görə tənqid olunduğundan nəzərdən keçirdiyimiz “Mələklər və şeytanlar” filmində ssenarist bəzi məqamlara xüsusi diqqət yetirmişdir. İlk filmdə tarixi faktları izah edən aktyorların replikləri çox uzun olduğundan tamaşaçıların tənqid hədəfinə çevrilmişdir.

 

Kitabda təsvir edilən hadisələri olduğu kimi tamaşaçıya ötürmək istəyi dialoqların uzun və sıxıcı olmasına səbəb olmuş və kinonu yorucu formaya salmışdır. Bunları nəzərə alan ssenarist Akiva Goldsman ikinci filmdə tarixi faktlardan bəhs edən dialoqları daha qısa formada təqdim etməyə çalışmış və beləliklə də filmin gedişatı daha axıcı olmuşdur. Lakin film tənqidçiləri bu dəfə də kitabdakı əsas hadisələrin ixtisar edildiyini və buna görə də filmin kitab qədər hadisələri ehtiva edə bilmədiyini bildirmişlər.

 

 

Çəkilişləri Roma və Los Angelesdə baş tutmuş filmdə məhşur aktyor Tom Hanks Robert Langdon, Ayalet Zurer Vittoria Vetra rollarını canlandırmışlar. Filmin ilk səhnələrində alim Leonardo Vetranın ölümü ilk başda terrorist qrupu tərəfindən işlənilmiş cinayət kimi görünsə də, tezliklə bunun özünü “illimunati” kimi təqdim edən bir qrup tərəfindən törədildiyi və məqsədlərinin Vatikanı yox etmək olduğu ortaya çıxır.

 

 

Bu hadisələrlə eyni zamanda katolik kilsəsi Papa XVI Liusun ölümü ilə yas tutur və Vatikanda onun xələfini seçməyə hazırlaşır. Papa olmağa seçilən dörd namizəd “illuminati”ni təmsil etdiyini deyən bir adam tərəfindən ələ keçirilir. Həmin adam tələb etdiyi kapsulu gətirməsələr Vatikana yerləşdirilmiş bomba ilə oranı məhv edəcəyini və ələ keçirdiyi namizədləri gecə yarısına qədər öldürəcəyini bildirir. Buna görə də amerikalı professor Robert Langdon məsələni araşdırmaq üçün Romaya dəvət edilir. Hadisənin şahidi olmuş İtalyan alim Vittoria Vetra da cinayət günü oğurlanan maddənin tapılmasına köməklik edir.

 

Beləliklə də 400 illik antik simvolların axtarışı başlamış olur.

Filmin çəkilişləri zamanı meydana çıxan problemlər bir çox tənqidçilərə görə filmin daha çox məhşurlaşmasına səbəb olmuşdur. Belə ki, Dan Braunun “Da vinci şifrəsi” filminin kilsənin nüfuzuna xələl gətirdiyini və insanların dini inanclarını tənqid etdiyini bildirən Roma katolik kilsəsi filmin Vatikanda çəkilməsinə icazə verməmiş və Santa Maria del Popolo ve Santa Maria della Vittoria kimi kilsələrdə çəkimlər həyata keçirilə bilməmişdir. Caserta Sarayı Vatikan olaraq, Biblioteca Angelica isə Vatikan Kitabxanası olaraq istifadə edilmişdir.

 

Dan Braunun “Mələklər və Şeytanlar” kitabını oxumamısınızsa bu film Sizə çox maraqlı gələcək. Çünki son ana qədər filmin necə bitəcəyini anlamaq çox çətindir. Lakin kitabı oxumusunuzsa film Sizə bir qədər sönük görünə bilər. Düzdür kitabları filmlərə görə dəyənləndirmək düzgün olmadığı kimi, filmi də kitabla müqayisə etmək ədalətsizlik olardı. Bütün sadalan xırda çatışmazlıqlara baxmayaraq “Mələklər və şeytanlar” filmi son dövrlərdə ekranlaşdırılan ən maraqlı filmlərdən biridir. Buna görə də Sizlərə həm təhlil etdiyimizi filmə baxmağı, həm də eyniadlı əsəri oxumağı şiddətlə tövsiyə edirik.

Xoş seyirlər və xoş oxumalar!