IMDB platformasına görə ən yaxşı film: “Şouşenkdən qaçış”

“Şouşenkdən qaçış” filminə yəqin ki çox az sayda kinoman baxmamış olar. Filmi təhlil edərkən onun IMDB-də 1-ci yerdə olduğunu da xatırlatmaq istərdik. Belə ki, adıçəkilən filmin uzun illər bundan əvvəl, 1994-cü ildə çəkilməsinə baxmayaraq, hələ də ən çox baxılan filmlərdən olması təsadüfi deyil.

Rejissor Frenk Darabontun ekran əsəri olan “Şouşenkdən qaçış” filmi baş qəhrəman, bank vitse-prezidenti Endi Dyufreynin (Tim Robbins) öz yoldaşını ona xəyanət edərkən görməsi, yoldaşının və onun sevgilisinin ölümündə günahlandırılması ilə bağlı məhkəmədə çıxış etməsi səhnələri ilə başlayır. Paralel formada tamaşaçıya təqdim olunan bu səhnələrdə törətmədiyi cinayətə görə ömürlük cəza alan Endi Şouşenk həbsxanasına göndərilir.

 

Həbsxana həyatının çətinliyi, orada baş verənlər, dustaqların öz aralarındakı münasibətləri ətraflı formada təsvir edilir. Bütün çətinliklərə baxmayaraq Endi uzun illər ərzində həbsxana yoldaşları və həbsxana rəhbərliyi arasında hörmət qazanır. Qısa zaman ərzində o, öz təcrübəsi və bank işlərinə bələd olması sayəsində həbsxana rəhbərliyinə külli miqdarda pul qazandırır.

Və bir gün həbsxanaya yeni bir cinayətkar gətirilir. O, Endinin günahsız olduğunu sübut edə biləcək məlumatlardan xəbərdardır, bunu dərhal rəhbərliyə çatdıran Endinin həbsxanadan çıxacağına dair ümidləri yaranır. Amma ondan öz işlərində istifadə edən həbsxana müdiri buna qəti etiraz edir və onun şahidi kimi ifadə verməyə hazır olan həmin gənci öldürtdürür.

Başına gələn bütün bu bəlalara baxmayaraq Endinin yanında onunla çox möhkəm dostluq qurmuş Red var. Onların arasında həbsxanada keçmiş uzun illər ərzində çox sağlam bir dostluq yaranır. Lakin öz taleyi ilə barışan Reddən fərqli olaraq Endi Şouşenkdə ömürlük qalmaq fikrində deyil. Yeri gəlmişkən, Red rolunu çox ustalıqla icra edən Morgan Freeman karyerasının ən yüksək performanslarından birini məhz bu filmdə ifa edir.

 

Endinin həbsxanada olarkən bir çox dustaqlarla yaşadığı polemikalar, həbsxana müdriyyəti ilə olan münaqişələri onun üçün onsuz da çətin olan həbsxana həyatını tamamilə dözülməz hala gətirir və o, Şouşenkdən çıxış üçün yollar axtarır və nəhayət geoloji sahədəki bilikləri sayəsində çox fərqli bir qaçış planı qurur.

Filmin ssenarisi tamaşaçı üçün həddindən artıq maraqlı formada qurulub. Filmdə son ana qədər Endinin etdiyi bir çox şeylərdən məna çıxarmaq mümkün olmur, yalnız filmin sonunda bütün suallar öz cavabını tapır.

 

Bu film zənnimizcə insanın haqsızlığa uğradıqda nələr edə biləcəyi, haqqın, ədalətin mütləq gec və ya tez təcəlli edəcəyi, dostluğun qazanacağı, pis əməllərin gec də olsa cəzalandırılacağı barədə möhtəşəm bir filmdir. Biz bir çox filmlərə baxmağı Sizə məsləhət görsək də, bu dəfə Sizə bu filmə bir dəfə deyil, bir neçə dəfə baxmağı məsləhət görürük. Çünki film sərf edəcəyiniz vaxta əsla heyfslənməyəcəyiniz, kinomotoqrafiya sahəsində çox yüksək peşəkarlıqla çəkilmiş möhtəşəm filmlərdəndir.

Xoş seyirlər…