Son dövrlərdə Netflix platformasında ən çox baxılan, sosial şəbəkələrdə ən çox haqqında bəhs olunan “Squid Game” filmini bu gun mərcək altına alacağıq. Hər kəsin bu qədər maraqla seyr etdiyi bu filmin ana məğzi nədən ibarətdir, verilən əsas mesajlar nələrdir və ən əsası filmi izləməyə dəyərmi?
Koreyalı rejissor Hwan Dong-hyukun ekran əsəri olan “Squid Game” filmi uşaq oyunları tərzində qurulmuş, əslində olduqca sadə görünən oyunlar oynayaraq 38.7 milyon dollar qazanmaq şansı əldə edən, maddi cəhətdən çətinliyi olan 456 nəfərlik bir qrup insanın yaşadıqlarından bəhs edir. Qalibin mükafatı çox yüksək olsa da, məğlubiyyətin nəticəsi də çox ağlasığmazdır. Belə ki, bu oyunlarda məğlub olanlar dərhal öldürülür.
Baş rollarında Lee Jung-jae, Park Hae-soo, O Yeong-su, Wi Ha-joon, Jung Ho-yeon, Heo Sung-tae, Anupam Tripathi və Kim Joo- Ryoungun oynadığı bu filmdə canlandırılan 456 nəfər son ümidlərini bu oyuna bağladıqları üçün həyatlarını belə riskə atan insanlardır.
Oh İl-nam isə beyin xərçəngi olan yaşlı bir kişinin obrazıdır. Bu qoca adam ölümü gözləmək yerinə bu oyuna daxil olaraq həyatına rəng qatmağa çalışır. Amma bu obraz o qədər dərin ideyaların, fikirlərin məhsuludur ki finalda olanlara bir çox tamaşaçıların inana bilməyəcəklərini əminliklə deyə bilərik. Düzdür, filmi izləyən bir sıra izləyicilər bu obrazla bağlı bir neçə səhnədə müəyyən mülahizələr yürütdüklərini bildirirlər, lakin istənilən halda filmin sonu çox gözlənilməz, möhtəşəm formada işlənilib. Əlbəttə buna sonluq da demək olmaz, çünki bu sadəcə birinci sezonun finalıdır.
AMP komandası olaraq şəxsi rəyimizə gəldikdə isə, deyə bilərik ki bu filmin bu qədər çox izlənilməsi heç də təsadüfi deyil. Düzdür, “Squid Game” bir sıra ağır səhnələrin olduğu, həqiqətən də bəzən ekrana baxmağa belə ehtiyat edəcəyiniz süjetlərlə dolu bir filmdir. Buna görə də əsəbləri zəif olan tamaşaçılara filmi izləməyi məsləhət görmürük. Lakin insan münasibətləri, maddi çətinliklər fonunda insanların nələr edə biləcəkləri bundan daha gözəl bir formada vizuallaşdırıla bilməzdi.
