“Lovehard”: Yeni ildə yeni sevgi hekayəsi

Yeni il ərəfəsində hər bir kinoman, baxa biləcəyi filmlərin siyahısını tərtib etməyə başlayır. Bəs Siz hansı filmlərə baxmağı planlaşdırırsınız? Hər il eyni filmlərə baxmağı sevirsiniz yoxsa bu il yeni filmlərin axtarışındasınız? Əgər seçiminiz yeni filmlərdən yanadırsa, Sizə ən yeni, noyabrın 5-i izləyicilərə təqdim olunmuş “Lovehard” filmini məsləhət görərdik.

Film Netflix platformasında təqdim olunub və baş rollarda Nina Dobrev, Jimmy O.Yang, Darren Barnet çıxış edir.

Nina Dobrev Los-Anceles-da yaşayan gənc bir qızın – Natalianın obrazını canlandırır. Onun uzun müddətdir ki, şəxsi münasibətləri yolunda getmir və o, əsl sevginin axtarışındadır.

Natalia sosial şəbəkədə Coş adında bir oğlanla tanış olur. Günlərcə onunla danışır, şəkillərdə gördüyü bu yaraşıqlı oğlana ilk baxışdan aşiq olur. Yeni ili onunla keçirməyi təklif edən Coş isə Nyu-Yorkda yaşayır. Natali rəfiqəsinin də təkidi ilə Coşa surpriz edərək Nyu-Yorka getmək qərarına gəlir. Çətin keçən yol səyahətinin sonunda o, Coşun evinə gəlib çatır, amma burada heç gözləmədiyi bir hadisə ilə qarşılaşır.

Filmin ən maraqlı səhnələri də məhz bu vaxt başlayır. Natalinin başına gələnlər əlbəttə ki xoş olmayan hadisələrdir. Lakin rejissor bu hadisələrin fonunda əsl sevginin xarici görünüşlə bağlı olmadığını, mənəvi hislərin insan həyatındakı rolunu ön plana çəkir. Hadisələrin gedişatını tam açıb filmə olan marağınızı azaltmaq istəməsək də, deyə bilərik ki, yeni il konseptli kinolar arasında bu film xüsusilə fərqlənir.

Bu filmə baxarkən İsveç alimlərinin maraqlı bir təcrübəsini xatırladıq və Sizinlə də bölüşmək istərdik. Belə ki, İsveç alimləri yeni doğulan körpələri gözəllik standartlarının üzərində olan dayələr və normal görünüşdə olan dayələrin qucağına verilməsi zamanı onları müşahidə etmişlər. Uşaqların böyük əksəriyyəti gözəl görünüşlü dayələrin qucağına getməyə meyilli olmuşlar. Bu da onu göstərir ki, insan yaradılış olaraq gözəllik aşiqidir.

Amma dünyaya yenicə göz açmış körpədən fərqli olaraq yetişkin insanlarda şüur, mənəvi hisslər inkişaf etmişdir. Bəzən xarici görünüşü çox gözəl insan, sadəcə danışmağa başlayarkən belə bizə uyğun təbiətdə olmadığını anlayırıq və ya əksinə.

Natalianın Coşun xarici görünüşü ilə əlaqədar gözləntiləri reallaşmadıqda çox təəssüflənir, amma onun aylarca danışdığı, hər dərdini bölüşdüyü də məhz Coşdur. Ona görə filmin növbəti səhnələrində bu ikilinin arasındakı münasibətin necə dəyişildiyini müşahidə edirik.

Filmdə üçüncü baş qəhraman isə Tag adlı, əsl Natalianın xəyallarında canlandırdığı oğlandır. Natalia xarici görünüşü çox ürəyincə olsa da, Tag ilə xasiyyətlərinin nə qədər fərqli olduğunu görür, lakin yenə də son ana qədər ondan vaz keçmir.

“Lovehard” filminin final səhnəsi əslində hadisələrin dinamik inkişafı fonunda gözlənilən formada yazılıb. Amma buna baxmayaraq Yeni il ab-havasında, romantik komediya janrında, stressdən, gərgin səhnələrdən uzaq axıcı bir filmə baxmaq istəsəniz bu filmi mütləq dəyərləndirin.

Son zamanlar Netflix platformasında “Squid Game”, “You” kimi gərgin və ağır ssenarisi olan filmlər çox sevilir. Amma zənnimizcə bəzən bu cür psixoloji şiddətin ön planda olduğu kinolara fasilə vermək lazımdır və bu fasilədə “Lovehard” filmini izləsəniz heç peşman olmazsınız.

Doğrudur, illərcə hamı tərəfindən sevilərək izlənən “Evdə tək başına” və ya başqa məşhur yeni il konseptli filmlər qədər çox uğurlu ssenari olduğunu deməsək də, romantik ruhlu gözəl bir film izləyəcəyinizə söz verə bilərik.

Odur ki, hamınıza, xüsusilə Nina Dobrev fanlarına bu filmdə xoş izləmələr diləyirik.