Yəqin Sizə də hansısa kitabı oxuyanda və ya filmə baxanda hadisələrin əks istiqamətdə inkişaf edəcəyi halda ssenarinin necə dəyişəcəyi maraqlı olub. Hətta bir çox ssenaristlər bunu nəzərə alaraq paralel dünyalarda seçimlərimizlə hadisələrin necə dəyişəcəyini bizə göstərirlər. Netflix platformasında ən çox izlənilən türk filmlərindən biri olan “Atiye” filmində də biz baş qəhrəmanın seçimləri ilə paralel dünyalardakı hadisələrin inkişafının şahidi oluruq.
Məqaləmizdə təhlil edəcəyimiz “İSGƏNDƏRə yeni NAMƏ” tamaşasında da Nizaminin “İsgəndərnamə”sinə yeni nəfəs verilib. Belə ki, “Nizami Gəncəvi ili” çərçivəsində hazırlanmış bu tamaşada invariantda olduğundan fərqli olaraq İsgəndər axtardığı dirilik suyunu tapır, Nizaminin möhtəşəm əsərindən fərqli istiqamətdə irəliləyən səhnə əsərinə yeni bir can verilmiş olur. Burada məqsəd səhnədə yenilik yaratmaq, Nizaminin köhnəlməyən fəlsəfəsini müasir səhnədə fərqli bir formatda təqdim etməkdir. Ümumilikdə isə tamaşa “İsgəndərnamə” poemasının motivləri əsasında hazırlanmışdır.
Bildiyimiz kimi poemada İsgəndər dirilik suyunu tapa bilmir və dünyadan köçür. Dirilik suyunu tapan Xızır isə onu içib qiyamətə qədər qeybə çəkilir. Tamaşada isə İsgəndərə dirilik suyunu içmək qismət olur. Əslində uzun illərdir Nizami filosofları bunu hər daim təhlil etmiş, İsgəndərin dirilik suyunu içərsə dünya üçün faciəvi ola biləcəyini bildirmişlər.
İsgəndər obrazı isə poemanın müxtəlif hissələrində dirilik suyunu içərsə, dünyada ali ədaləti bərqərar edəcəyini bildirir. Tamaşanın yaradıcılarına görə, insan əbədi həyatın yükünü çəkə bilməz. Hətta tamaşada xalq artisti Nurəddin Mehdixanlının canlandırdığı Hörmüz obrazı insanın Tanrı ola bilməyəcəyini çox təsiredici şəkildə dəfələrlə vurğulayır.
